Platt in Scholen

In Hamborg snackt un lehrt de Schölers Platt

In’n Süden vun de Elv, ümto Finkwarder un Neenfelde un in de Veer- un Maschlannen köönt de Kinner siet dat Schooljohr 2010/2011 vun de eerste Klass an Platt lehren. Fröher hebbt de Schölers in de School blots mol en Geschicht oder en Gedicht op Platt to Gesicht kregen. Man nu köönt se de norddüütsche Regionoolsprook so as anner Spraken ok vun Klass een an richtig lehren. So steiht dat ok in de Rohmenrichtlinien för de Hamborger Scholen binnen. Un de Plattdüütschroot hett tohoop mit en Sponser dat Geld för en „Arbeitsbook Plattdüütsch“ op den Disch leggt. De Schoolbehöörd hett de Schoolmesters to dat Book dat nödige Materiool an de Hand geben.

Wat Platt angeiht, löppt Hamborg op goden Kurs!

De Bundesroot för Nedderdüütsch mookt sik dorför stark, dat de Kinner in all Bunneslänner, in de Plattdüütsch snackt warrt, ok in de School de Sprook lehren köönt un de tostännigen Ministerien för de nödigen rechtlichen Grundlogen sorgen doot. Dat hett de Root sik nich utdacht. So steiht dat siet 1999 in de “Europäische Charta der Regional- oder Minderheitensprachen” un so verlangt dat siet de Tiet ok de Europaroot.

Plattdüütschpries för Hamborg

All twee Johr vergifft de Plattdüütschroot för Hamborg tohoop mit den Vereen Plattdüütsch in Hamborg e.V. den „Plattdüütschpries för Hamborg“. De Gewinners kriegt 1.000 Euro. Mit den Pries warrt Scholen un Kinnergoorns uttekent, de heel besünner Soken op Platt moken doot.