Wokeen wi sünd un wat wi wüllt
De Plattdüütschroot för Hamborg

100.000 Minschen in Hamborg köönt Plattdüütsch. Üm de ehr Anliggen kümmert sik siet 2003 de Plattdüütschroot för Hamborg. He passt dorför op, dat de Regionolsprook Plattdüütsch in de Free’e un Hansestadt Hamborg to ehr Recht kümmt. In den Plattdüütschroot för Hamborg sitt Lüüd, de vun de Hamborger Bürgerverenen, vun de Frakschonen in de Börgerschop, vun de Komern, vun ‘n Rundfunk, vunde Verwaltung un vun’t Ohnsorg-Theoter bestimmt worrn sünd.

Plattdüütsch un Politik

Siet 1999 gellt in Düütschland de „Europäische Charta der Regional- oder Minderheitensprachen“. Düsse Verdrag is internatschonool Rechtsgoot. He schall dorför sorgen, dat dat mit düsse Sproken nich wieder bargdool geiht.

Dat heet för uns:

– mehr Platt in’n Kinnergoorn, in Scholen un Hoochscholen;
– mehr Platt in Amtsgeschäften, vör Gericht, in de Wirtschaft un in dat soziole Leben;
– mehr Platt in de Kultur un in de Medien.

Platt is nu mol de Sprook, de ok bi uns in Hamborg to Huus is. Un so schall dat ok blieben. Un dorför, dat dat bargop geiht mit Platt, dorför mööt all Verenen, Organisatschonen un Institutschonen Hand in Hand arbeiten. De Plattdüütschroot för Hamborg steiht jüm dorbi to Siet. Un he hett dor ‘n scharp Oog op, dat dor ok wat bi rutkümmt.

Bundesroot för Nedderdüütsch

In Düütschland sünd dat Millionen vun Minschen, de Platt snacken doot, un dat in acht vun de sössteihn Bundeslänner. Üm jüm all kümmert sik de Bundesroot för Nedderdüütsch. Dor sünd ok twee Lüüd vun den Plattdüütschroot för Hamborg mit bi. De Bundesroot passt op, dat de Regionoolsprook Plattdüütsch in de Bundeslänner, man ok bi’n Bund in Berlin un bi ‘n Europaroot in Straßborg to ehr Recht kümmt. De Minschen höört Platt geern. Un mehr un mehr Minschen snackt ok wedder Platt op de Stroot oder mit Frünnen un Bekannten. Man noch sünd wi nich so wiet, dat all Lüüd weet: dat is goot, wenn jeedeen mehr as een Sprook kann. Dorüm is dat ok so heel wichtig, dat wi an Platt fasthoolt. Un dat wi Platt an de Kinner un de Enkelkinner wiedergeben doot.

Düt sünd de Mitglieder vun den Plattdüütschroot för Hamborg.

Peer-Marten Scheller Handwerkskammer (Sprecher) c/o Quickborn-Verlag Alter Postweg 21 21075 Hamburg Tel.: 040 778131 E-Mail: sprecher@platt.hamburg			Carina Dawert Ohnsorg-Theater (stellv. Sprecherin)
Björn Beeken Vier- und Marschlande			Sylvia Pein-Dethloff Quickborn-Vereiningung
Renate Brömmer Behörde für Schule und Berufsbildung			Prof. Ingrid Schröder Universität Hamburg
Olaf Duge Fraktion Bündnis 90 / Die Grünen			Nils Springborn SPD Fraktion
Eckard Graage CDU Fraktion			Insa Tietjen Fraktion Die Linke
Uwe Hansen Verein Plattdüütsch in Hamborg e.V.			Jan Wulf NDR 90,3
Uwe Michelsen Evangelische Kirche