Kategorie-Archiv: Neeis

De drütte Hamborger Plattdüütschdag an’n 25. April 2020 fallt ut!

Wegen de jümmers leger warrn Corona-Epidemie, hett de Plattdüütschroot för Hamborg besloten, den för den 25. April ploonten Plattdüütsch Dag aftoseggen. Wi finnt dat to un to schood un wüllt höpen, dat Ji dat all verstohn doot.

Wi verleggt den Plattdüütsch Dag üm een Johr op den 24. April 2021. Un de öber 50 Veranstaltungen, de hier un dor un öberall in Hamburg vun so veel Lüüd mit masse Arbeit al op’n Weg bröcht worrn sünd, de nehmt wi mit.

Wi bedankt uns bi all, de uns so düchtig hulpen hebbt un mit so veel Spooß un Iever mitmookt! Hollt Jo fuchtig un blievt gesund!

 

 

 

Mitmoken bi den Plattdüütschdag 2020!

De Anstalten för den drütten Hamborger Plattdüütschdag hebbt anfungen. An düssen April-Dag schall Hamborg wedder de Haupstadt vun de Plattdüütschen warrn. Dorüm roopt wi all Verenen, Initiativen, Krinks un Organisatschonen op, dat se dorbi mitmoken doot. Also, loot Jo wat infallen! Wat köönt Ji bi Jo to Huus vör de Döör, bi Jo in de Stadtdele de Lüüd an düssen Dag anbeden? Meldt dat wat ji moken wüllt eenfach online an, wi freut uns!